أَبَيَّنْ زِينْ!!
شعر: عبد الغني عبده
***
مكتوب على جبين الصبية كلمتين:-
"سكة سفرْ"!!
محفور على جبين الجدع سطرين:-
"من فين تروح ولـ فين
مافيهاش مفرْ...
لازمنْ تعود لحضنها
ترجع بكفك مهرها...
بالحنة تزرع أرضها
تخطفها وتطير ع الحصانْ...
تبني لها عش من المودة والحنانْ
وتعطره بالورد والعود والريحانْ
.......
تبني لها عش من المودة والحنان والحب ...
الحب حارس ع البيبان ...
.......
الحب حارس ع البيبان ...
ليلو نهارو ديدبان ...."
كل الصبايا بجناحات...
عصافير ساعات
وساعات يمام ...
وساعات سمك[i]!!
والبنت "مفرودة الجناحْ"
مكتوب على جبينها السفرْ...
ومفيش مفــــرْ....
لازمن تفارق أهلها لابن الحلال
يغازلها يوم ...
يناغشها يوم...
وشيء فـ فشيء
يقولها يا أمو العيال...!!
.......
البنت مفرودة الجناح
مكتوب على جبينها السفر
ومفيش مفـــرْ!!
والبنت مش عاشقة القمر
ولا رايدة كام مليون "ريال"[ii]
البنت طالبة مهرها حبة عرق
تروي الغيطان تطرح بنات تفرح رجال
............
منقوش على جبين الوطن....
آيــة أماااااااااااااااااااان.
منقوش على جبين الوطن أية أمان[iii].
***
[i] (الواد اصطاد السمكة......
الواد اصطاد البلطية).

[ii] (إديها ريال إديها....
إديها ريال ولا بريزة).
[iii] (ادخلوا مصر إن شاء الله آمنين)...من الآية 99 سورة يوسف